چینگڈو (اے پی پی) صدر مملکت آصف علی زرداری چینگڈو اچ ݙوجھے گولڈن پانڈا ایوارڈزانٹرنیشنل کلچر فورم توں خطاب کریندے لوکاں کوں متحد کرݨ تے تہذیباں کوں جوڑݨ اچ فن تے ثقافت دی اہمیت تے زور ݙتا۔ انہاں آکھیا جو ایجھی فنکارانہ کوششاں سرحداں پار کرتے سانجھی انسانی اقدار دے ذریعے لوکاں کوں کٹھا کریندن۔ انہاں صوبہ سیچوان دی حکومت تے منتظمین دا شکریہ ادا کیتا۔ صدر مملکت “تہذیب دے تبادلے تے باہمی سکھݨ ” دے چین دے وژن کیتے پاکستان دی مکمل حمایت دا اظہار کیتا تے گلوبل ڈویلپمنٹ انیشیٹو (جی ڈی آئی)، گلوبل سکیورٹی انیشیٹو (جی ایس آئی) تے گلوبل گورننس انیشیٹو (جی جی آئی) دی اہمیت تے زور ݙتا۔ انہاں آکھیا جو پاکستان تے چین دی پائیدار دوستی سانجھے احترام تے تعاون تے کھڑی اے، تے ݙوہیں ملک آندے سال سفارتی تعلقات دی 75 ویں سالگنڈھ مناوݨ دی تیاری کریندے پئن ۔ انہاں ثقافتی تبادلیں کوں ودھاوݨ، تخلیقی صنعتاں کوں مضبوط کرݨ تے افہام و تفہیم تے رواداری دے کلچر کوں ودھارا ݙیوݨ کیتے چین تے ٻئے ملکاں نال رل تے کم کرݨ کیتے پاکستان دی تیاری دا اعادہ کیتا۔ انہاں آکھیا جو ثقافت امن، خوشحالی تے انسانیت دے سانجھے مستقبل کیتے ھک اہم پل اے۔ صدر مملکت دنیا اچ تھیوݨ آلیاں تبدیلیاں دا ذکر کریندے صدر شی جن پنگ دی قیادت تے چین دی تعریف کیتی تے آکھیا جو انہاں تصادم دی بجائے تعاون تے جت دے حل دی پیشکش کیتی اے۔
.jpg)
.jpg)