اسلام آباد۔9ستمبر (اے پی پی) علامہ اقبال اوپن یونیورسٹی دے وائس چانسلر پروفیسر ڈاکٹر ناصر محمود سیلاب توں متاثرہ علاقیاں اچ رہݨ آلے طالب علماں کیتے 120 ملین روپے دے خصوصی ریلیف پیکج دی منظوری ݙے ݙتی اے۔ ہک بیان اچ انہاں آکھیا جو یونیورسٹی دا مقصد مشکل حالات اچ طالب علماں کوں سہارا ݙیوݨ اے تاں جو او مالی مشکلات دے باوجود آپݨی تعلیم جاری رکھ سڳن۔ انہاں عزم کیتا جو علامہ اقبال اوپن یونیورسٹی تعلیم دے ودھارے اتے طالب علماں دی فلاح و بہبود کیتے جو تھی سڳدے کریندی رہسی۔ ڈائریکٹر سٹوڈنٹس افیئرز سید غلام کاظم علی دے مطابق، یونیورسٹی میٹرک اتے ایف اے پروگرام دے او طالب علم جیڑھے اڄاں تئیں فیس جمع نی کرائی، انہاں دی ایں سمسٹر خزاں 2025ء دی فیس مکمل طور تے معاف کر ݙتی ڳئی اے جݙاں جو گریجویشن اتے ایسوسی ایٹ ڈگری پروگرام دے طالب علماں کوں فیس اچ 50 فیصد رعایت ݙتی ویسی۔ انہاں آکھیا جو داخلیاں دی تاریخ وی ودھا تے 15 ستمبر تئیں کر ݙتی ڳئی اے تاں جو متاثرہ طالب علم آسانی نال آپݨی تعلیمی سرگرمیاں جاری رکھ سڳن۔ ایں اقدام نال نہ صرف سیلاب توں متاثرہ طالب علماں دے تعلیمی مستقبل کوں محفوظ بݨاوݨ دے پاسے ہک اہم قدم اے بلکہ اے یونیورسٹی دی انسانیت دوست پالیسی اتے قومی ذمہ داری کوں وی نشابر کریندے۔
.jpg)
