اسلام آباد۔14اگست (اے پی پی):قومی اسمبلی اچ ڈائمنڈ جوبلی کنونشن اچ شریک ارکان پارلیمنٹ ھک قرارداد متفقہ طور تے منظور کیتی اے جیں اچ معاشی استحکام حاصل کرݨ تے آپݨے مادر وطن دی ترقی تے خوشحالی دے وسیع تر مقصد دے حصول کیتے رل تے اصلاحات تے عمل پیرا تھیوݨ کیتے “میثاق معیشت ” تے فریقین وچال معاہدے تے زور ݙتا ڳئے ۔اے قرارداد سابق رکن قومی اسمبلی کشمالہ طارق پیش کیتی جیں اچ آکھیا ڳئے جو قومی اسمبلی اللہ تعالیٰ اتے پاکستانی قوم کوں جوابدہ اے، قرارداد اچ قیام پاکستان کیتے جدوجہد کرݨ آلیں دیاں قربانیاں تے انہاں دی شراکتداری، ارکان پارلیمنٹ اتے قانون سازیں دی دانشمندی دا اعتراف کیتا ڳئے ۔ قرارداد اچ اے وی آکھیا ڳئے جو بانی پاکستان قائداعظم محمد علی جناح دے ارکان پارلیمنٹ توں خطاب دے ناظر اچ پاکستان ایجھا وفاقی پارلیمانی جمہوریہ ہوسی جیں دی بنیاد سماجی انصاف دے اسلامی اصولاں تے مبنی ہووے۔ قرارداد اچ آکھیا ڳئے جو پوری دنیا تے اللہ تعالیٰ دی حاکمیت اے تے پاکستان اچ عوام دے منتخب نمائندے اللہ تعالیٰ دی مقرر کیتے ڳئی حدود دے اندر اپݨا اختیار مقدس فریضہ دے طور تے ادا کریندے پئن ۔قرار داد اچ مزید آکھیا ڳئے جو 1973 دے آئین دی تصنیف اتے اینکوں اپناوݨ دی تاریخ تے ورثے تے فخر اے جیں اچ وفاقی جمہوریہ دے اختیارات دی واضح حد بندی، عدلیہ دی آزادی، صوبائی خودمختاری اتے شہریاں دے بنیادی حقوق دی ضمانت ݙتی ڳعی اے ۔قرارداد اچ سپیکر توں گزارش کیتی ڳئی اے جو پارلیمانی کنونشن قومی اسمبلی اچ ہر سال منعقد کیتا ونڄے ۔سپیکر قومی اسمبلی راجہ پرویز اشرف اے قرارداد منظوری کیتے ایوان اچ کیتی جیں کوں ایوان متفقہ طور تے منظور کرڳھدا۔
.jpg)
