اسلام آباد۔16اگست (اے پی پی):وزیر خارجہ مخدوم شاہ محمود قریشی آکھیے جو اساݙا حتمی مقصد پرامن، متحد، جمہوری، مستحکم اتے خوشحال افغانستان اے۔اے ڳال انہاں افغان رہنماواں دے وفد نال ڳال کریندے ہوئیں آکھی اے جنہاں سنوار کوں انہاں نال وزارت خارجہ اچ ملاقات کیتی۔ملاقات وچ افغانستان دی صورتحال دے حوالے نال ڳال بات کیتی ڳئی ۔ شاہ محمود قریشی آکھیے جو ضروری ہے جو اساں رل تے افغانستان اتے خطے دی بہتری کیتے لائحہ عمل وضع کروں ۔اساݙا حتمی مقصد پرامن، متحد، جمہوری، مستحکم اتے خوشحال افغانستان اے۔میکوں قوی امید اے جو اساں رل تے امن اتے مفاہمت کوں اڳوں ودھا سڳدوں ۔عالمی برادری افغانستان اچ امن چاہندی اے ،افغان قیادت کیتے لازم اے جو او ایں تاریخی موقع دا فیدہ چیندے ہوئیں ،افغانستان دے وسیع البنیاد اتے جامع سیاسی حل دا رستہ ہموار کرے ،اساں سمجھدوں جو جامع مذاکرات، افغان مسئلے دے پرامن سیاسی حل دا واحد رستہ ہن۔ شاہ محمود قریشی آکھیے اساں نی چاہندے جو افغانستان اچ بدامنی ہووے تے اندرلے انتشار توں ہمسایہ ملک متاثر تھیون ، اساکوں امن مخالف انہاں عناصر تے وی کڑی نظر رکھݨی ہوسی جیڑھے پاکستان دے عالمی سطح تے منیے ڳئے مصالحانہ کردار کوں غلط رنگ ݙیوݨ دی کوششاں اچ مصروف ہن ، افغانستان دی حتمی منزل دے حصول اچ افغان معاشرے دا ہر طبقہ ھکو سویں اہمیت رکھیندے،پاکستان، افغانستان اچ قیام امن کیتے اپݨا تعمیری اتے مصالحانہ کردار ادا کرݨ سانگے پرعزم اے ۔
