اسلام آباد۔10جنوری (اے پی پی) وفاقی وزیر سرمایہ کاری بورڈ عبدالعلیم خان نال ترکیہ دی ائیر لائن ’’پیگاسس‘‘ اتے کاروباری ادارہ’’ ہٹ اِٹ‘‘ دی چیئرپرسن نور گو کمان جمعے کوں ملاقات کیتی۔ ایں موقع تے آپسی دلچسپی دے معاملیاں تے ڳالھ کیتی ڳئی۔ وفاقی وزیر سرمایہ کاری بورڈ عبدالعلیم خان ملاقات اچ ڳالھ مہاڑ کریندیں ہوئیں آکھیا جو پاکستان اتے ترکیہ وچال پراݨے دوستانہ تاریخی تعلقات ہن، پاکستان اتے ترکیہ دی عوام ہک ٻئے نال دلی رشتیاں اچ جڑیے ہئن۔ انہاں آکھیا جو غیر ملکی کاروباری اداریاں دی پاکستان اچ سرمایہ کاری کیتے حوصلہ افزائی کریسوں۔ ہٹ اٹ ااتے پیگاسس دی چیئرپرسن نور گو کمان پاکستان اچ مواصلات اتےشہری ہوابازی دے معاملیاں اچ دلچسپی ݙکھائی اتے آکھیا جو ترکیہ پاکستان نال بزنس ٹو بزنس کم ودھاوݨ چاہندے۔ انہاں وفاقی وزیر کوں ݙسیا جو ہٹ اٹ کمپنی 70 وݙی ائرلائنز نال مارکیٹ شیئر رکھیندی اے اتے اساݙی کمپنی پی آئی اے دی ساریاں توں وݙی پارٹنر اتے دنیا اچ ہوا بازی دے شعبے اچ تریجھی وݙی کمپنی اے۔ وفاقی وزیر سرمایہ کاری بورڈ عبدالعلیم خان ہٹ اٹ ولوں پاکستان اچ بزنس اچ دلچسپی دا خیر مقدم کیتا۔ ملاقات اچ ہٹ اٹ دے چیف آفیسر اطیلہ لیزے اتے پاکستان کیتے کوآرڈینیٹر آسی غامزے وی ملاقات اچ موجود ہن۔
