اسلام آباد ۔ 4 مئی (اے پی پی) وفاقی وزیر منصوبہ بندی و ترقیات و اصلاحات احسن اقبال آکھے جو چین پاکستان اقتصادی راہداری منصوبے تے چینی حکومت 46 ارب ڈالر سرمایہ کاری کریسی ، جیندے اچ 35 ارب ڈالر دی لاگت دے توانائی دے منصوبے وی شامل ہن ، انہاں اچوں سندھ اچ 11.3 ارب ڈالر اتے بلوچستان اچ 9.1 ارب ڈالر دے توانائی منصوبے شروع کیتے ویسن ، گوادر اچ 300 میگاواٹ دے پاور پلانٹس لائے ویسن ، سی پیک دے مغربی رستے اُتے کم تیزی نال جاری ہے ۔ اے گالہیں انہاں بدھ کوں خصوصی پارلیمانی کمیٹی برائے سی پیک دے اجلاس کوں بریفنگ ڈیندے ہوئیں آکھیاں۔ ایں موقعے تے کمیٹی دے چیئرمین سینیٹر مشاہد حسین سید، کمیٹی دے رکناں اتے کمیٹی دی دعوت تے گلگت بلتستان دے وزیراعلیٰ حافظ حفیظ الرحمان اتے بلوچستان دے وزیراعلیٰ نواب ثناء اﷲ زہری خصوصی طور تے شرکت کیتی۔ وفاقی وزیر احسن اقبال خصوصی کمیٹی کوں ایں منصوبے بارے تفصیل نال بریفنگ ڈیندے ہوئیں آکھیا جو سی پیک منصوبے کوں پورا کرنڑ کیتے چینی قیادت ہک مٹھ ہے اتے ایں بارے ایں منصوبے کوں کامیابی نال پورا کرنڑ کیتے اقدامات کر یندی پئی ہے ۔ انہاں آکھیا جو سی پیک منصوبہ پاکستان کیتے گیم چینجر منصوبہ ہے جیندے نال خطے دے لوکیں دی وڈی تعداد دا روزگار منسلک ہوسی ۔ منصوبے دے تحت گوادر اچ عالمی معیار دا ایئرپورٹ بنڑایا ویسی ، ہسپتال اتے تربیتی مرکزوی بنڑائے ویسن۔ انہاں آکھیا جو گوادر اچ 300 میگاواٹ دے بجلی دے پلانٹس لائے ویسن۔انہاں آکھیا جو توانائی دے جنہاں وڈے منصوبیاں تے کم تھیندا پئے انہاں اچ دیامر بھاشا ڈیم تے 14 ارب ڈالر، داسو ڈیم تے 12 ارب خرچ تھیسن۔ انہاں آکھیا جو ملک ا چ کولے دا بہوں وڈاذخیرہ موجو د ہے جیہڑا جو 400 سالیں کیتے کافی ہے ۔
.jpg)
